Të dhurosh dashuri për ata që iu mungon, të falësh ngrohtësi kur vetmia të rëndon në shpirt , një çasti t’i japësh vlerën e një ditë e më shumë. Me këto motive administratorët e Tv Kombit së bashku me të mirënjohurin, kampionin e botës, boksierin Florjan Marku, në këtë atmosferë të ndërrimit të viteve, kanë ndarë së bashku me banorët e shtëpisë së moshuarve në Fier çaste të bukura dhe të mbushura plot gëzim.
Trokitje gotash, shkëmbim urimesh për një jetë sa më të qetë dhe vite me shëndet të plotë në jetën e tyre, ka qenë atmosfera e mbizotëruar mes të moshuarve dhe organizatorëve të saj. Kampioni i botës Florian Marku me këtë pjesëmarrje tregon se shpirti i tij luftarak është i mbushur me një dashuri të rrallë në mënyrë të veçantë për moshën e tretë si në rastin e banorëve të shtëpisë së të moshuarve në Fier.
Marku dhe administratorët e TV Kombit e cilësojnë këtë event si fillesat e shumë mbështetjeve për shtresat në nevojë. Në këtë shtëpi banojnë 50 të moshuar nga rrethet e ndryshme të vendit dhe një xhest i thjeshtë iu solli buzëqeshje dhe lumturi në sytë e tyre
Gjithashtu Marku ka kryer një donacion për Institutin e Të Miturve në Kavajë. Aktivitetet e zhvilluara në këto mjedise janë një trokitje në zemrën dhe ndërgjegjen e secilit për të qenë sa më pranë njerëzve të cilët kanë nevoja dhe mbështetje jo vetëm financiare, por mbi të gjitha një dashuri e ngrohtësi zemre./Tv Kombi/
