Në 15-vjetorin e shpalljes së Pavarësisë, Kuvendi i Kosovës ka mbajtur një seancë solemne, ku krerët e shtetit atje dhe Presidenti shqiptar, Bajram Begaj, kanë dhënë mesazhe të veçanta. Seanca nisi me intonimin e himnit të Kosovës, ndërsa në foltore u vendos emblema e UÇK-së.
Në fjalën e tij, Begaj kujtoi figurat e shquara që punuan për pavarësinë e vendit, teksa theksoi se Kosova është shtet i pavarur, pavarësisht veprimeve të qeverisë serbe.
“U jemi falënderues shteteve mike që njohën menjëherë pavarësinë e Republikës së Kosovës. Në këtë ditë të shënuar, me mirënjohje kujtojmë Adem Jasharin, UÇK-në, luftëtarët e lirisë që edhe sot na frymëzojnë. Kujtojmë sot liderin simbol të forcës së durimit, shqiptarin që me zgjuarsinë e pashembullt çoi përpara kauzën e drejtë të pavarësisë së Kosovës, Presidentin Rugova. Në kuadër të bashkërendimit të forcave tona, dua të përshëndes mbledhjet e përbashkta të qeverive dhe nismat e mara në forcimin e lidhjeve tona në të gjitha nivelet. Këto nsima do gjejnë mbështetje e bashkëpunim te Presidenti i Shqipërisë. Republika e Kosovës është shtet i lirë e i pavarur sido të mendojë apo veprojë zyrtarisht qeveria serbe. Qeveria serbe duhet të bashkëpunojë me Kosovën për stabilitet dhe ruajtjen e paqes në rajon”, tha Begaj.
Presidentja e Kosovës, Vjosa Osmani, theksoi se tërësia territoriale dhe sovraniteti i vendit janë të pangociueshme, teksa shtoi se procesi i dialogut me Serbinë ka një epilog, njohjen reciproke.
“Procesi i dialogut me Serbinë e ka një epilog, njohja reciproke. Tërësia territoriale e sovraniteti jonë janë të panegociueshme. Përvjetorët si ky janë mundësi e mirë për të reflektuar mbi rrugëtimin tonë të gjatë, të dhimbshëm, por krenarë. Sa më shumë që të tjerët punojnë për minimin e shtetit tonë, aq më i fortë do të jetë uniteti ynë për ta forcuar dhe për ta përparuar atë, sepse Republika jonë është e përjetshme”, tha Osmani.
/rtsh.al/
