Ndërsa në mbarë botën festohet Krishtlindja, Presidenti ukrainas, Volodymyr Zelensky, i ka kërkuar popullit të tij që të kenë durim dhe t’i bëjnë rezistencë sulmeve ruse. Ai shprehet se liria ka një çmim të lartë, dhe se do ti duhet të durojnë këtë dimër për t’ju rikthyer sërish festimeve të munguara si pasojë e luftës.
“Ne duruam në fillim të luftës. Ne duruam sulme, kërcënime, shantazh bërthamor, terror, sulme me raketa. Le të durojmë këtë dimër sepse ne e dimë se çfarë po luftojmë. Ne do të festojmë festat tona! Si gjithmonë. Do të buzëqeshim dhe do të jemi të lumtur. Si gjithmonë. Ndryshimi është një. Nuk do të presim për një mrekulli. Në fund të fundit, ne e krijojmë vetë,” tha presidenti ukrainas ndërsa shtoi se “Liria ka një çmim të lartë. Por skllavëria ka një çmim edhe më të lartë.”
Shumica e ukrainasve janë të krishterë ortodoksë dhe shënojnë natën e Krishtlindjes, ditën kryesore të sezonit festiv në vend më 6 janar. Megjithatë, një numër në rritje i adhuruesve e kanë festuar ditën më 24 dhjetor, në përputhje me shumicën e të krishterëve në mbarë botën.
Sulmet me raketa dhe dron të Rusisë kanë lënë miliona ukrainas pa energji, ngrohje dhe ujë të rrjedhshëm.Vetëm një ditë më parë sulmet ajrore ruse vranë 10 persona në qytetin jugor Kherson të Ukrainës, ndërkohë 68 persona të tjerë u plagosën.
/rtsh.al/
