Ballina Bota SHBA sanksionon zyrtarët dhe kompanitë e lidhura me luftën në Ukrainë

    SHBA sanksionon zyrtarët dhe kompanitë e lidhura me luftën në Ukrainë

    1

    Shtetet e Bashkuara të Amerikës kanë vendosur sanksione kundër zyrtarëve dhe bizneseve të lidhura me agresionin rus në Ukrainë.

    Sanksionet e së mërkurës kanë vënë në objektiv një tregtar armësh, djalin e tij dhe një grup kompanish në Azi, Evropë dhe Lindjen e Mesme lidhur me përpjekjet për të furnizuar me armë Moskën në luftën e saj gati njëvjeçare.

    Departamenti i Thesarit njoftoi sanksione kundër tregtarit rus të armëve Igor Zimenkov, djalit të tij Jonatan-it dhe kompanive të lidhura me “rrjetin Zimenkov” në Singapor, Qipro, Bullgari dhe Izrael, mes disa vendeve të tjera.

    “Përpjekjet e dëshpëruara të Rusisë për të përdorur palë të treta, për anashkalimin e sanksioneve amerikane, tregojnë se sanksionet e kanë bërë shumë më të vështirë dhe më të kushtueshme për industrinë ushtarake ruse që të furnizojnë makinerinë ushtarake të Putinit”, tha Zëvendës Sekretari i Thesarit Wally Adeyemo.

    Departamenti i Thesarit vuri sanksione ndaj 22 individëve dhe organizatave, për të cilët tha se ishin të lidhur me rrjetin për mënjanimin e sanksioneve me qëllim mbështetjen e makinerisë ushtarake ruse.

    Departamenti i Thesarit tha se gjatë vitit të kaluar u vunë sanksione ndaj më shumë se 100 individëve dhe subjekteve të angazhuara në aktivitete për mënjanimin e sanksioneve ndërkombëtare dhe kontrollit të eksporteve ndaj Rusisë.

    Masa bllokon çdo llogari që posedojnë subjektet në Shtetet e Bashkuara dhe i ndalon ata të bëjnë biznes me amerikanë apo në Shtetet e Bashkuara.

    “Vënia në shënjestër e ndërmjetësve është një prej hapave të shumtë që Departamenti i Thesarit dhe partnerët e koalicionit kanë ndërmarrë dhe vazhdojnë të marrin, për të shtrënguar zbatimin e sanksioneve kundër sektorit të mbrojtjes ruse”, tha Adeyemo.

    Më shumë armë rrisin tensionet, thotë Rusia

    Rusia tha të mërkurën se furnizimi i Ukrainës me armë me rreze të gjatë veprimi nuk do të frenojë forcat ruse, por do të rrisë tensionet dhe do të përshkallëzojë konfliktin.

    Komentet nga zëdhënësi i Kremlinit, Dmitry Peskov, erdhën mes njoftimeve se Shtetet e Bashkuara po përgatisin një paketë të re ndihmash për Ukrainën që do të përfshijë raketa me rreze më të gjatë veprimi për të ndihmuar forcat ukrainase përballë agresionit rus.

    Agjencia e lajmeve Reuters njoftoi se, sipas dy zyrtarëve amerikanë me dijeni për këtë çështje, një armë e quajtur bombë me diametër të vogël e lëshuar nga toka me një rreze veprimi prej 150 kilometrash, ishte pjesë e paketës që pritet të njoftohet këtë javë.

    Gjithashtu pjesë e paketës pritet të jenë antitank “Javelin”, sisteme kundër dronëve dhe artilerisë, automjete të blinduara, pajisje komunikimi dhe pajisje mjekësore të mjaftueshme për mbarëvajtjen e tre spitaleve në terren.

    Mykhailo Podolyak, këshilltar i Presidentit Volodymyr Zelenskyy, shkroi të mërkurën në rrjetin Twitter se çdo fazë e luftës kërkon armë të caktuara.

    Ai tha se tashmë ka një koalicion partnerësh që po ndihmojnë Ukrainën me tanke dhe trajnim për përdorimin e tyre dhe se ka “bisedime për raketa me rreze më të gjatë veprimi dhe furnizim me avionë luftarakë”.