Rusia ka në plan të sabotojë impiantet me energji hidrike dhe kabllot nënujorë të komunikimit që ndodhen në detin e Veriut.
Kështu thotë një investigim i përbashkët i televizioneve publike në Danimarkë, Norvegji, Suedi dhe Finlandë.
Sipas hetimit, Rusia ka një flotë anijesh të kamufluara si anije peshkimi në detin e Veriut, të cilat kryejnë mbikëqyrje të pajisjeve nënujore dhe po hartojnë impiantet kyçe për një sabotim të mundshëm.
Të dhënat e mediave kryesore të katër vendeve nordike konfirmohen edhe nga oficerë të kundërzbulimit danez, sipas të cilëve planet për sabotim po përgatiten në rast të një konflikti tërësor me Perëndimin.
Transmetuesit televizivë thonë se kanë analizuar komunikime të përgjuara që tregojnë se të ashtuquajturat “anije-fantazmë” në ujërat veriore kanë fikur transmetuesit për të mos zbuluar vendndodhjet e tyre.
Njëra prej tyre është anija e quajtur “Admirali Vladimirsky”. Zyrtarisht ajo është një mjet për ekspedita oqeanike, apo për kërkime nënujore, por sipas investigimit në të vërtetë është një anije ruse spiunazhi.
Gjasat janë që mjeti lundrues të dëmtojë sistemet e komunikimit mes vendeve skandinave për të shkaktuar kaos në rast konflikti.
E njëjta anije u lokalizua vitin e kaluar në brigjet skoceze. Ajo u pa teksa i afrohej fjordit Morej Firth më 10 nëntor dhe 30 milje detare në lindje të Losimauth, ku ndodhet dhe baza detare e mjeteve të patrullimit të Forcave Ajrore Mbretërore.
