Kryetari i bashkisë Armando Subashi në cilësinë e kandidatit të PS për Bashkinë e Fierit zhvilloi një takim me banorët e fshatit Agim, në njësinë administrative të Libofshës. “Në njësinë tuaj kishim disa probleme themelore për të zgjidhur së pari ishte rruga nga kthesa e Imshtës deri në Hasturkas, kishim probleme me ujin e pijshëm pasi disa nga fshatrat nuk kishin fare rrjet për furnizim , kanalet vaditëse dhe kulluese me shumë problematika pasi për 30 vjet nuk kishin njohur asnjë investim.” evidentoi ai.
Subashi e ka cilësuar një situatë katastrofike që kërkonte ndërhyrje të menjëherëshme. “Me ato investime që janë bërë me buxhetin e bashkisë janë bërë punë të tilla në territor që ato komunat e vogla deri në 2015 nuk kishin mundësi t’i bënin. Sot numërohen me gishtat e dorës ato fshatra që nuk janë lidhur me asfalt me qendrën e komunës. Ne po shohim çdo ditë e më shumë që fermeri po i kthehet punës, bujqësisë, i është kthyer prodhimit. Vetë rruga që bëmë drejt Hasturkasit dhe pak më vonë me Babunjën, duke krijuar unazën bujqësore dhe me bashkinë e Divjakës janë dy segmente shumë të rëndësishme qoftë nga pikëpamja bujqësore, por Edhe lehtësojnë lëvizjen e banorëve nga një zonë në tjetrën.
Ne jemi duke punuar me një grup të posaçëm për të projektuar dhe përfunduar rrugën drejt detit. Shpresoj shumë që këtë vit ne të marrim financimin e rrugës nga Manastiri i Ardenicës deri në Libofshë dhe sigurisht mandej deri në manastirin e Shën Kozmait dhe me tre kishat 300-vjeçare, plotësojnë shumë mirë peizazhin kulturor dhe turistik. Synimi ynë është që ta kthejmë këtë në një paketë të vetme turistike. Qeveria shqiptare përmes FSHZH-së ka miratuar një investim prej 700 milion lekësh të vjetra për gjithë zonën e Libofshës,për të vazhduar pikërisht me këtë strategji në projekte.”, tha Subashi. Ai ka garantuar banorët e Agimit që kërkesat e tyre që janë mbajtur shënim do të vazhdohen të kryehen pasi ky proces investimesh nuk lidhet me 14 majin. “Ne nuk po nxitojmë se në 14 maj kemi zgjedhjet dhe të bëjmë sa më shumë punë për t’i hedhur hi syve njerëzve. Nuk është fare në filozofinë tonë”, u shpreh në vijim Subashi.
Në fund të fjalës së tij Subashi ka përcjellë dhe mesazh politik.”Në 14 maj do të votojmë për kryetarin e bashkisë dhe këshillit bashkiak. Nuk duhet ta devijojmë votën e PS diku tjetër . Atë që po bën sot në parlament Saliu dhe Iliri, atë do bëjnë dhe këta salinjtë e vegjël duke u munduar të bllokojnë punët e këshillit, do krijojnë tension, prandaj përgjigjja më e mirë është të garantojmë shumicën e këshillit bashkiak që të vazhdojmë të ecim përpara me të gjitha projektet, me të gjitha financimet dhe me gjithë ato çfarë duam të realizojmë në katër vitet e ardhshme. Vota për PS është përgjigjja më e mirë qoftë për Saliun, qoftë për Ilirin, por nga ana tjetër është mbështetja më e madhe për Edi Ramën” tha Subashi.
/Tv Kombi/
