Deputeti i PD, Enkelejd Alibeaj ka folur sot në lidhje me procesin e zgjedhjes së presidentit.
Gjatë një deklarate për mediat, Alibeaj tha se është përgjegjësi e të gjitha forcave politike të marrin pjesë në proces, ndërsa shtoi se mazhoranca socialiste nuk e ka legjitimitetin për ta zgjedhur e vetme kreun e shtetit.
“E rëndësishme të diskutojmë për çështje të interesit publik dhe të interesit të PD. Të rëndësishme janë ngjarjet parlamentare. Për zgjedhjen e Presidentit ju e dini që cili është qëndrimi im personal.
Qëndrimi i grupit parlamentar të PD është i qartë dhe në konsultim me deputetët, duke marrë peshën e përfaqësimit së paku të gjysmës së shqiptarëve, duke mos i ikur përgjegjësisë, por duke marrë përgjegjësi.
Është test politik për të gjitha palët politike të marrin pjesë në proces, do marrim pjesë në diskutime.
Kjo mazhorancë nuk e ka legjitimimin për të zgjedhur presidentin. Shqiptarët duan një profil politik i cili mos të ketë të bëjë fare me influencën e non-gratave.
Janë 4 deputetë të kësaj mazhorance që nuk e kanë të drejtën morale dhe politike për të votuar për presidentin”-tha Alibeaj.