Një prej prokurorëve që hetonte krimin e organizuar në Guayaquil të Ekuadorit ka mbetur i vrarë nga dy të rinj që u arrestuan 24 orë pas krimit nga policia vendase.
Edgar Escobar, prokuror i njësisë së personave dhe garancive në Guayaquil u qëllua për vdekje ditën e hënë, pak metra larg zyrës së tij, ndërsa mediat vendase raportojnë se vrasja me pagesë ka pasur si qëllim mesazhin për autoritetet hetimore.
Të gjitha dyshimet çojnë tek tonelatat e kokainës që nisen nga qyteti-port i Guayaquilit, për t’u shpërndarë më pas kryesisht drejt Europës, ku edhe portet e Ballkanit kanë qenë shpeshherë zona transiti.
Vetëm në Durrës janë sekuestruar herë pas here sasi të konsiderueshme kokaine, mes pakove me banane që vinin nga Ekuadori, ndërsa linja është e shpërndarë edhe në Malin e Zi, Greqi, etj.