Presidenti Rexhep Tajip Erdogan ka reaguar mbi ngjarjen e ndodhur në Suedi, ku një shtetas i vuri flakën librit të shenjtë të Kuranit.
Erdogan tha se ata që kryen aktin e urryer dhe “ata që e lejojnë atë nën petkun e lirisë së mendimit, ata që mbyllin sytë ndaj kësaj poshtërsie” nuk do t’i arrijnë qëllimet e tyre.
“Ne do të tregojmë reagimin tonë në mënyrën më të fortë derisa të bëhet një luftë e vendosur kundër organizatave terroriste dhe armiqve të Islamit”, tha Erdogan.
Ministri i Jashtëm turk Hakan Fidan e quajti përdhosjen e Kuranit “të neveritshme”.
“Është e papranueshme të lejohen këto veprime anti-islamike nën pretekstin e lirisë së shprehjes”, shkroi Fidan në Twitter.
“Të mbyllësh sytë ndaj akteve të tilla mizore do të thotë të jesh bashkëfajtor”.
Në janar, një incident i ngjashëm me Rasmus Paludan, një politikan i ekstremit të djathtë që dogji një Kuran në Stokholm pranë ambasadës turke, përkeqësoi tensionet midis dy vendeve.
